Daçiq: Trump më i mirë për Serbinë, Nëse fiton Biden ai do të kërkojë njohjen e Kosovës


Ministri i Jashtëm serb, Ivica Daçiq, ka lavdëruar presidentin amerikan Donald Trump duke thënë se Administrata e tij është më në interes të Serbisë, sidomos karshi çështjes së Kosovës.

Madje, ai tha se kjo temë do të varet nga kush do ta zërë vendin në Shtëpinë e Bardhë.

Në skenarin ku fitues dalin demokratët, për Daçiqin nuk është aspak e mirë, sepse, sipas tij, në administratën demokratike nuk do të ketë kërkesë për kompromis ndaj Serbisë, por vetëm një kërkesë – Serbia ta njohë Kosovën.

“Nëse shohim nga aspekti i asaj që lejonte administrata, ajo e Trumpit ishte sigurisht më pozitive për ne, gjë që kontribuoi që çështja e Kosovës të mos paraqitet nga aspekti se tashmë është një punë e kryer”, tha Daçiq në RTS.

Ai beson se zgjedhjet e ardhshme janë specifike, sepse Trump është “një kandidat më specifik dhe më burrë”.

Daçiq, që ishte zëdhënësi i kriminelit Sllobodan Millosheviq në vitin 1992, i bëri edhe një lëvdatë Trumpit që asnjëherë s’ka punuar në ushtri.

“Ne harrojmë se ky është kandidati i parë që nuk ka punuar në ushtri apo në ndonjë funksion tjetër shtetëror dhe u zgjodh. Ai është presidenti më i pasur në historinë e Amerikës”.