Gjithçka që ndodh në botë, disa prej familjeve në Kosovë vazhdojnë ta shohin me vetëm dy ngjyra, të vetmet që u shfaqen në televizor, bardh e zi. Përveç mungesës së televizorit me ngjyra, të tjera familje nuk kanë as makinë për larjen e rrobave, e nuk kanë ujë brenda shtëpisë./
Për disa prej familjeve kosovare gjithçka që ndodh jashtë mureve të shtëpisë, ku banojnë është veç bardh e zi. Gjithë kjo në mungesë të një televizori me ngjyra.
Numri i familjeve që nuk posedojnë një televizor të tillë shkon deri në 5 për qind në gjithë vendit. Por, kjo nuk është mungesa e vetme që kanë.
Përveç televizorit me ngjyra, rreth tre për qind e familjeve kosovare, nuk kanë as makinë për larjen e rrobave. Edhe në temperaturat më të ftohta, detyrohen që t’i lajnë rrobat me dorë.
Madje, në shumicën e rasteve edhe jashtë shtëpisë. Disa prej këtyre familjeve nuk kanë as ujë brenda shtëpisë, e të tjerave iu mungon uji i nxehtë.
Së paku kështu thuhet në raportin “Rezultatet e Anketës së Buxhetit të Ekonomive Familjare 2017”, të publikuar nga Agjencia e Statistikave të Kosovës.
Në bazë të raportit të ASK’së, në ekonomitë familjare në Kosovë, ende ka familje që nuk kanë ujë, toalet e lidhje telefonike brenda shtëpisë.
E derisa në shumicën e familjeve janë më shumë se pesë telefona mobil, rreth 1 për qind e shtëpive nuk e posedojnë as edhe një telefon të tillë.
Për dallim prej familjeve që i kanë këto mungesa, të tjerat që i kanë nuk janë në gjendje t’i paguajnë në kohë faturat për shfrytëzimin e tyre.
Sipas raportit të kësaj agjencie, ekonomitë familjare shpesh nuk janë në gjendje të paguajnë në kohë pagesat siç janë qiraja, kreditë, tatimet, shpenzimet komunale – faturat, mirëmbajtje të rregullta etj.
“Te ekonomitë familjare që një here nuk kanë mundur të përballojnë pagesat është vërejtur rritje prej rreth 8 për qind në vitin 2017, në krahasim me vitin 2016. Gjatë vitit 2016, 45 për qind e ekonomive familjare dy herë ose më shumë nuk kanë mundur të përballojnë pagesat, ndërsa në vitin 2017 është vërejtur një rënie e vogël prej rreth 2 për qind”, thuhet në raportin e ASK’së. /Gazeta Express