Një tjetër kosovar ka bërë bujë për shkelje të rregullave të shpejtësisë në rrugët e Zvicrës.

Kosovari 33-vjeçar është kapur nga policia e Aargaut të dielën pasdite duke drejtuar veturën Audi me shpejtësi 174 kilometra në orë në një rrugë ku shpejtësia maksimale e lejuar është 80 kilometra në orë, raporton “Aargauer Zeitung”.

Ai po drejtonte veturën në rrugën mes Seengenit dhe Egliswilit.

Gjatë kontrollit është konstatuar se kosovari e kishte tashmë patentshoferin e pezulluar.

“Pak pas orës 14:00 është kapur nga radari një Audi me shpejtësi 174 kilometra në orë. Policia e ndaloi veturën, e cila po drejtohej nga një kosovar 33-vjeçar.

Pasi që ai po e drejtonte veturën me një shpejtësi të dënueshme, u aktivizua prokuroria. Është hapur procedurë ndaj 33-vjeçarit dhe është marrë vetura e tij. Në fund u konstatua se ai e kishte patentshoferin e pezulluar”, thuhet në njoftimin e Policisë Kanonale të Aargaut.

Pak ditë më parë një tjetër kosovar bëri bujë në Zvicër për shkelje të shpejtësisë.