Ish-anëtari i Lëvizjes Vetëvendosje, aktivisti i shoqërisë civile, Rron Gjinovci ka thënë se Albin Kurti ka ndryshuar qëndrim ndaj Gjykatës Speciale për interes të tij.
Gjinovci duke iu referuar pohimeve të Kurtit se të gjithë duhet të bëhen bashkë në mbrojtjen të ish-pjesëtarëve të UÇK-së që po gjykohen për krime lufte në Hagë, ka shtuar se Kurti edhe në të ardhmen mund të bëjë ndryshime të tilla për interesa të tjera.
“Kjo bëhet problematike kur deklaratat të tilla japin politikanët me peshë siç mund të jetë Albin Kurti i cili sipas gjasave mund të jetë kryeministri i ardhshëm i Kosovës. Kur kryeministri i ardhshëm flet kundër sistemit të drejtësisë në këtë mënyrë për një interes të caktuar kjo na tregon që ky kryeministër në të ardhmen për një interes tjetër mundet me fol prapë kundër sistemit të drejtësisë dhe ne si qytetar me pa me shqetësim deklarata të tilla kundër Gjykatës Speciale”, ka deklaruar ai për Ekonomia Online.
Gjinovci poashtu i ka konsideruar ndërhyrje në sistemin e drejtësisë të gjitha deklaratat e politikanëve kosovarë për Gjykatën Speciale.
“Të gjitha deklaratat që janë bërë rreth Gjykatës Speciale nga politikanët janë problematike. Njerëzit duhet me pas parasysh që Gjykata Speciale është e paraparë në nenin 103 pika 7 e Kushtetutës së Republikës së Kosovës që do të thotë se është pjesë e gjyqësorit të Kosovës me Dhoma të Specializuara”.
“Është paraparë me ligjet e Kosovës dhe me Kushtetutës e saj që kjo gjykatë më pas gjykatës dhe prokurorë të huaj ashtu që mos me pas ndikim, me pas paanshmëri të madhe. Gjykata është e Kosovës çfarëdo diskutimi kundër Gjykatës Speciale nga politikanët është ndërhyrje në sistemin e drejtësisë, në pushtetin e tretë që në fakt është një pushtet i ndarë nga ekzekutivi dhe legjislativi” ka shtuar ai.