Ministri Zemaj
Institucioneve shëndetësore në të gjitha nivelet do t’i bashkohen 1500 specializantë përfshirë edhe 70 nga Lugina e Preshevës. Ministri i Shëndetësisë, Armend Zemaj tha sot se specializantët do të mbulojnë nevojat imediate që kanë ndal në pah nga pandemia Covid 19. Krahas kësaj, kreu i shëndetësisë tha se gjendja epidemiologjike me Covid 19, është stabile në vend, derisa paralajmëroi se nesër mund të largohet kushtëzimi i testit PCR të Maqedonisë së Veriut për shtetasit e Kosovës.
Në një konferencë të përbashkët për medie, Zemaj bashkë me bordin për Shkollim Specialistik, tha se me vendimin për shtim të numrit për specializantë, do të ruajnë dinjitetin e mjekëve të rinj që të rrinë në vend.
“E plotësuam edhe me 70 vende për vëllezërit dhe motrat tona nga Lugina e Preshevës. Ndërsa sot dëshironim t’iu njoftonim me planin e ri, dinamikën e re që e kemi zhvilluar dhe hapësirë krijuar nga bordi për Shkollim Specialistik dhe vlerësimi ynë i përbashkët, gjithmonë duke marrë për bazë që kanë mjekët e rinj për t’u përfshirë të gjithë në procesin e specializimit. Kërkesa e re për të shtyrë vende shtesë duke përfshirë të gjithë aplikantët të cilët kanë aplikuar dhe i plotësojnë kushtet dhe kriteret të japim lajmin se Kosova, institucionet e saj do të shtojë numrin e 1500 specializantë që do t’i bashkëngjiten kolegëve të tyre në institucionet tona shëndetësore në të gjitha nivelit. Do të mbulojnë nevojat imediate të cilat jo vetëm që i ka qitur në pah pandemia. Por po tregojmë që e ruajmë dinjitetin e mjekëve të rinj që të rrinë këtu, e mos kemi ikje”, tha ai.
Ministri i Shëndetësisë tha se situatën e mirë me pandeminë do të shfrytëzojnë për t’u përgatitur në infrastrukturën shëndetësore dhe rritjen e kapaciteteve për testime.
“Sa i përket menaxhimit të pandemisë jemi në një situatë të mirë ta quaja, stabile por nuk do të thotë që ky lehtësim, frymëmarrje e lehtë për neve dhe profesionistët shëndetësore duhet që të kalojë në anashkalim të masave dhe mbikëqyrje të masave. Përgatitje janë evidente, ne jemi duke përgatitur. Kjo kohë dhe ky presion që ishte i tepërt gjatë muajve të kaluar tash po na jep mundësi të përgatitemi në dy aspekte. E para është infrastruktura e dyta është kapacitetet që ne i quajmë ato humane që janë përgatitja për testime, barëra dhe pjesë të tjera që janë në proces të përfundim e sipër”, tha ai.
Zemaj e ka mirëpritur edhe largimin nga lista e zezë të Kosovën nga disa vende perëndimorë, ai e cilësoi këtë si mundësi për bashkatdhetarët të vijnë në Kosovë.
“Me kolegun tim maqedonas kemi qenë në komunikim intensiv. Besojmë që nesër në mbledhjen e tyre të qeverisë do të largohet kushtëzimi i testit PCR dhe të kalojmë në nivel tjetër të komunikimit dhe zbatimin e tjerave masave mbrojtëse të cilat janë evidente” tha ai.
Në katër vitet e fundit nuk ka pasur konkurs për fare për specializantë nga Ministria e Shëndetësisë.